أنا متهفيتش في عقلي ولا اتجنيت يوم ما فكرت أكتب عن تجربتي الشخصية مع الختان
اه هو دا ، الحاجة اللى محدش بيتكلم فيها ولما بتتقال كله بيتنح لبعضه
أنا إتختنت
قبل ما أدخل المدرسة كنت عند بنت عمتي اللى اتختنت لأن دورها جه بما انها 11 سنة
فاكرة ازاى فرجت بنات العيلة على العملية اللى عملتها - واللى كان غير مسموح لينا احنا "الصغيرين" اننا نشوفها
هى عملية معرفش عن ايه - كل اللى اعرفه انها عملية "عيب" وإني هعملها هعملها
بفعل إنعدام الثقافة الجنسية في الأسرة وكل مصادرك للمعلومات هى أصحابك اللى متعرفش هم صح ولا غلط
فهمت من صاحباتى في ابتدائي ايه هو الختان أو الطهارة زي مابيطلقوا عليه - كنت خايفة
كبرت وخلصت الإبتدائي وفي الأجازة قدرت استشف سبب الزيارة الغريبة اللى هعملها انا وماما
لصاحبتها في البيت اللى ليها بنت في سنى - وفي حضور الطبيب
عرفت إن دوري جه
كنت متحمسة جدا ، يمكن لأن نفسي أكبر النهاردا قبل بكرة
ولأن العملية العيب دي هي اللى هتنقلنى من طفلة لآنسة
طلعنا انا وبنت صاحبة ماما الدور التاني .. الدكتور جه .. ضربات القلب بتزيد والخوف بقى رعب
حاولت أستعطف ماما علشان نروح لكنها كانت بتهديني وفي نفس الوقت بتدي إيدي للدكتور علشان اخد حقنة البنج
وبعدها مفوقتش غير على صوت تليفزيون حواليا حاولت اتحرك بس كنت حاسة بشوية وجع
وببص على السرير التاني لقيت بنت صاحبة ماما نايمة هى كمان من اثر البنج
همممم - واضح إن العملية تمت بنجاح
اتعرفت على البنت دي في أسوء ذكرى تمر على أنثى - يوم الختان
اللى فكراه ان اثر العملية خفيف وانى محسيتش بتغيير جذري
احساسي بأن في حاجة غلط مستمر لحد دلوقتي وهو دا الأثر النفسي للختان
الدكتور كان دكتور ممتاز وكان فاهم ودا كان واضح بعد العملية
لكن التشوّه النفسي مازال موجود - لسه حاسة ان في حد من غير وجه حق بتر جزء من جسمي
حكم عليا إني هطلع ساقطة او فتاة ليل ، فاقرر أنه يغير مصيري وينقذني من الوهم اللى هو اخترعه
لسه حاسة إن طفولتى إتسرقت
لسه حاسة إن برائتى إتشوهت
لسه حاسة بالسرقة - حد سرقني ومش هعرف ارجع اللى سرقه
الختان : ذكرى سوداء .
--
الختان ليس من العفة ولا الطهارة في شئ
العفة بتيجي بالتربية على الفضيلة والحث على تجنب الرذائل .
الرغبة الجنسية محلها العقل ومن ثَم الأعصاب الحسية في الأعضاء التناسلية
مش الأعضاء التناسلية
- ربيها متبترهاش
-اللى شايفين الحديث عن الختان ملوش لازمة احب اقوله المشاكل الجنسية هى سبب فساد مجتمعك المصري العظيم - حلوا المشاكل الجنسية .
----
الكلام ده تجميع لرأي طبيب جراح / أحمد السلمي ، عن الختان من تويتر
* لتقريب مفهوم الختان جراحيا للشباب فهو زي قص العضو الذكري ونصف كيس الصفن "كيس الخصيتين" ..طبعا الشاب هيبقى عفيف اخر حاجه بعديها .
هخلي المشاكل النفسية للاخر بس المهم ان البنت لما تتجوز تعاني العذاب لان الرغبة الجنسية موجودة وبقوة لكن لا توجد*
اعضاء حساسة لاكمال .
*
العملية والوصول للنشوة او الاورجازم اللي هو غي النهاية مطلب الجنسين في كل زمان ومكان فتكون اول مشكلة ان الست ممكن تتهم زوجها بعدم الرجولة ..
لانه لم يستطيع امتاعها ويحقق هدفها وبالطبع يتأثر الرجل بهذا الاحساس وتقلب الدنيا نكد علني او نكد محبوس في صدر الاثنين ومداريين عليه ..
*
#ضد_الختان الرجل اللي يفهم المفروض اول واحد يكون معارض للختان لانه ممكن يكون فحل ولكن بدون نتيجه فيتحول لقطه ..طبعا في ستات تنجو من المصير ده لان عملية الختان احيانا تكون متفاوته فيبقى لها من الاعضاء الحساسة ما يوصلها للنشوة وان كان في زمن اطول .
*
#ضد_الختان والتفاوت ده في مصر موزع جغرافيا على مصر من الشمال للجنوب بمعنى ان اقل بتر يكون في الشمال ويزداد في الصعيد ويصل في السودان الى...
*
#ضد_الختان في السودان يتم بتر كل الاعضاء التناسلية الخارجية للمراءة مسح عارفين يعني ايه مسح يعني ولا شئ ظاهر واعتقد جنوب الصعيد كذلك ...
*
#ضد_الختان في ناس مفترض انهم علماء بقولوا ان الختان مطلوب علشان يمنع احتكاك البظر بالملابس الداخلية اثناء المشي طبعا كلام فاكس ولا يسوى .
*
#ضد_الختان عايز ارجع ااكد ان البظر في النساء يناظرة العضو الذكري في الرجال وان الشفرين الكبيرين والصغيرين يناظرهما المنطقىه الجلديه الحساسه
*
#ضد_الختان التى تغطي القضيب حتى تصل لكيس الصفن ..تخيل مأساة البنت !! انتهى .. نقول ايه فوائد عدم الختان بسرعة ..
*
#ضد_الختان واحب اكلم الرجل خصوصا عن فوائد عدم الختان وهو ان زوجتك عندما تثيرها ستكون قابلة للوصول للقمه والاشباع في دقائق ويمكن تسبقك كمان
#ضد_الختان فتخيل عزيزي الزوج الفرق بين اللي تكسر ظهرك وبين اللي تكسر ظهرها ويمكن تعمل اسد وتقولها ايه ده انتى شبعتى انا لسه!! تعالى كمان..
*
#ضد_الختان المشاكل النفسية للبنت من الختان خطيرة اولها انها هتكره ابوها وامها للابد ولو لم تعترف بذلك وطبعا غير المشاكل اللي شرحناها وابسطها
*
#ضد_الختان الطلاق وتشرد العيال لان الختان لا يؤثر على الخلفه بس هتكون خلفة نكد للست ...انتهى .
----
حابة أشارككم بقاعدة بنات ثانوي
خلصنا درس بدري يوم الجمعة وطلعنا عند صاحبتي نقعد عندها قبل الصلاة
فتحنا الكلام في الممنوع "الختان"
علشان نكتشف إن كلنا بنعاني من نفس الضرر النفسي والتشوّه الجسدي .
أنا مش هختن بنتي
مش هغتال طفولتها ولا هسرق برائتها
مش هحكم عليها بالموت وتتعذب طول حياتها وتعذب معاها زوج ملوش ذنب
مش ههد حياتها الزوجية علشان عادة متخلفة تتساوى عندى بالقرابين
مش هعمل نفسي إله وأصدر عليها حكم أعمى بالإنحلال الأخلاقي ويكون علاجه هو البتر .
---
الختان لا يمنع البنت من الوقوع في الخطأ ولكن التربية تفعل .
نسيت أقول إن المسكوت عنه خلاص ، مبقاش هيتسكت عليه .
Ghadeer Ahmed
5/6/2012
أزال المؤلف هذا التعليق.
ردحذف