أنا عاوزة أتكلم النهارده عن موضوع حساس وممكن ميعجبش ناس كتير، بس اللي خلاني عاوزة أتكلم فيه هو انتشاره في الفترة الأخيرة وبصورة ملحوظة.
لما بدأت تعلو موجة الكلام عن حقوق النساء في مصر في الفترة اللي فاتت، كان فيه موجة تانية بالتوازي معاها، وهي موجة ظاهرها مناصرة الستات وباطنها لومهن.
طيب إزاي مناصرة وإزاي لوم؟!

في نفس الفترة الأخيرة دي، فيه بنات وستات كتير بدأت تتكلم وترفض انتهاكات بتحصلها، أو تعيد النظر في طريقة تفكيرها وأهداف حياتها، عرفت إن الجواز مش الغاية والهدف، وإنها لازم تكون صاحبة القرار في حياتها وجسمها، وشايفة إن كل بنت وست لازم تفكر كده، ودول الفئة الأولى.
وفي المقابل فيه بنات تانية لسّه بتفكر بطريقة تفكيرها العادية، إنها هتتجوز وتخلف والعيال مسؤوليتها لوحدها، ولازم تسمع كلام جوزها، ومينفعش تقول لأ لأبوها لأنه عارف مصلحتها أكتر منها، ودي كمان فكرتها عن أي ست غيرها.. إلخ، ودول الفئة التانية. 

وهتكلم عن تعاملنا إحنا الستات مع الفئة التانية بالأخص.
الفئة الأولى اتقابلت مننا بالهجوم أحيانًا وبالترحيب أحيانًا، لكن الفئة التانية اتواجهت باللوم والسّب وتحميلها عبء أكبر منهن.
اتقال إن الستات دي هن السبب في اللي وصلتله الفئة الأولى، لأنهن وافقن إن دي تكون حياتهن وحياة غيرهن من الستات، ورغم إن ده جزء منه حقيقي، لكن جزء كبير مننا بيعتبروه الحقيقة كلها.

الستات دي نتيجة وجزء من منظومة بنرفضها، لكنهن مش المنظومة نفسها ولا السبب في وجودها، ولا في خنقتنا إحنا وهنّ، وده مش دفاع عنهن بقدر ما هو توضيح للواقع اللي بنعيشه كلنا.

مهم وإحنا أفكارنا بتطور وبتنضج، نتفهّم أفكار غيرنا، ونتفهّم سياقاتهم وواقعهم المختلف عن واقعنا، قبول الستات دول لأوضاعهن وعدم تمردهن مبيجعلش منهن السبب في اللي إحنا عايشينه كلنا كستات، باختصار لأن كل واحدة مسؤولة عن حياتها هي مش عن حياة كل الستات اللي في مصر، وده اللي لازم نفهمه وهن كمان يفهموه، عشان يقف دور كل ست مننا عند حدود حياتها هي وبس، مفيش واحدة مننا تصدر أحكام على غيرها أو تصنفها أو تبرر الانتهاك اللي بيحصلها، واللي ترضى فينا فعل ترضاه لنفسها فقط مش للي حواليها كمان.

ويمكن فعل "التبرير" هو الغلطة من وجهة نظري، إن الفئة الثانية بتبرر انتهاكها وانتهاك الفئة الأولى، لكن مهما كان التبرير لا يتساوى بفعل الانتهاك.

والأفضل إننا نتوجه باللوم للمنتهِك، واللي سمح بالانتهاك يحصل، مش للي برر الانتهاك، لأن مهما برر فهو مرتكبش الفعل، ومش هنحاسب الناس على أفكارهم.

اللي عاوزة أقوله إن مهم الستات تفهم ليه فيه ستات بتبرر انتهاك ستات غيرهن، ونعرف إن الستات دول نتيجة مش سبب، ولازم نشوف سبب الانتهاك ونتصدى له، بدل ما نتبادل الاتهامات بينا.